Thu Nov 07 07:44:42 UTC 2024: ## ബഹിരാകാശത്ത് കുടുങ്ങിയ സുനിത വില്യംസിന്റെ ആരോഗ്യത്തില് ആശങ്ക: ഡോക്ടർമാർ
അമേരിക്കൻ ബഹിരാകാശയാത്രികയായ സുനിത വില്യംസ്, സ്റ്റാര്ലൈനര് പേടകത്തിന്റെ സാങ്കേതിക തകരാറിനെ തുടർന്ന് ബഹിരാകാശ നിലയത്തിൽ കുടുങ്ങിയിരിക്കുകയാണ്. ഡോക്ടർമാർ സുനിതയുടെ ആരോഗ്യനിലയിൽ ആശങ്ക പ്രകടിപ്പിക്കുന്നു. ബഹിരാകാശ നിലയത്തിൽ നിന്നും പുറത്തുവന്ന പുതിയ ചിത്രങ്ങളിൽ മുഖം മെലിഞ്ഞൊട്ടി, ക്ഷീണിതയായ നിലയിലാണ് സുനിതയെ കാണുന്നത്.
സുദീർഘമായ ബഹിരാകാശ വാസത്തിന് ശേഷം സുനിത പൂർണ്ണ ആരോഗ്യവതിയാണെന്ന് ഡോക്ടർമാർ കരുതുന്നില്ല. പുതിയ ചിത്രങ്ങളിൽ, സുനിത പീത്സ ഉണ്ടാക്കുന്നത് കാണാൻ കഴിയും. എന്നാൽ വിശദമായി നോക്കിയാൽ സുനിതയുടെ മുഖം മെലിഞ്ഞൊട്ടിയിരിക്കുന്നതും മൂക്ക് മാത്രം വല്ലാതെ തള്ളി നില്ക്കുന്നതും വ്യക്തമാകും. ഭക്ഷണം കുറച്ച് മാത്രം കഴിക്കുന്നതിനെ തുടർന്നാണ് കവിളുകള് ഇത്തരത്തില് ഒട്ടിപ്പോകുന്നതെന്ന് വിദഗ്ധർ പറയുന്നു. ബഹിരാകാശത്ത് ഗുരുത്വബലമില്ലാത്തതിനാല് ശരീരത്തിന് സ്വാഭാവിക പ്രവർത്തനങ്ങള്ക്കായി കൂടുതല് ഊർജം ആവശ്യമായി വരും. ഊർജനഷ്ടം ഒഴിവാക്കുന്നതിനായി ബഹിരാകാശ യാത്രികർ പൊതുവേ വളരെ പരിമിതമായ അളവില് മാത്രമാണ് ആഹാരം കഴിക്കുന്നത്. ഭക്ഷണം കുറയ്ക്കുന്നതിന് പുറമെ പേശികളുടെ ആരോഗ്യം നിലനിര്ത്താനും എല്ലുകളുടെ സംരക്ഷണത്തിനുമായി ദിവസം രണ്ടര മണിക്കൂറില് കുറയാതെ ഇവർ വ്യായാമവും ചെയ്യും. ഇതെല്ലാം കൂടിച്ചേരുമ്പോൾ ശരീരം ക്ഷീണിക്കുക സ്വാഭാവികമാണ്.
രാജ്യാന്തര ബഹിരാകാശ നിലയത്തില് നിന്നും ഒക്ടോബർ 29ന് മടങ്ങിയെത്തിയ നാല് ബഹിരാകാശ സഞ്ചാരികളെ കഴിഞ്ഞ ദിവസം വൈദ്യപരിശോധനയ്ക്ക് വിധേയരാക്കിയിരുന്നു. തുടർച്ചയായി 200 ദിവസം ബഹിരാകാശത്ത് കഴിഞ്ഞതിന് പിന്നാലെ ഇവരിലൊരാള്ക്ക് കടുത്ത അസ്വസ്ഥതകള് അനുഭവപ്പെട്ടു. പിന്നാലെ മറ്റുള്ളരെയും ആശുപത്രികളില് നിരീക്ഷണത്തിലേക്ക് മാറ്റുകയായിരുന്നു.
പത്ത് ദിവസത്തെ ദൗത്യത്തിനായി ജൂണില് ബഹിരാകാശത്തേക്ക് പോയ സുനിതയും ബുഷ് വില്മോറും സ്റ്റാര്ലൈനര് പേടകത്തിന്റെ സാങ്കേതിക തകരാറുകളെ തുടർന്ന് ബഹിരാകാശ നിലയത്തിൽ തങ്ങുകയായിരുന്നു. സെപ്റ്റംബറില് സുനിത തന്റെ പിറന്നാള് ആഘോഷിച്ചതും ബഹിരാകാശത്താണ്. ഇരുവരും യുഎസ് പ്രസിഡന്റ് തിരഞ്ഞെടുപ്പില് ബഹിരാകാശത്തിരുന്ന് വോട്ടും രേഖപ്പെടുത്തി. ഫെബ്രുവരിയില് ഇരുവരെയും തിരികെ ഭൂമിയില് എത്തിക്കുമെന്നാണ് നാസ പറയുന്നത്.
First Piper 