Wed Oct 30 16:20:02 UTC 2024: ## दीपोत्सवाच्या तयारीत उटण्याचा सुगंध
**नेरूळ, ता. २८ (बातमीदार)** : वसुबारसनिमित्त गाय-वासराचे पूजन करून सोमवारपासून दीपोत्सव सुरू झाला आहे. बाजारपेठांसह घरे, अंगणे रोषणाईने सजलेली दिसत आहेत. या सणाला उटण्याचा सुगंध विशेष महत्त्वाचा ठरतो. दिवाळीच्या पहाटे तेल आणि उटणे लावून अंघोळ करण्याची प्रथा आहे. उटणे हे केवळ सणासुदीसाठीच नव्हे तर आरोग्यासाठीही फायदेशीर आहे.
उटणे त्वचा कोरडी पडण्यापासून रोखते, चेहरा चमकदार करते आणि त्वचेवरील सुरकुत्या कमी करण्यास मदत करते. यात आंबेहळद, मसूर, चंदन, रक्तचंदन, कात, नागरमोथा असे विविध नैसर्गिक घटक असतात जे त्वचेला स्क्रबर म्हणून काम करतात. याशिवाय उटण्यात मध किंवा दूध मिसळल्याने त्याचे फायदे अधिक वाढतात.
आजकाल बाजारात विविध सुगंधी उटणे उपलब्ध आहेत. याची किंमत १० ते ५० रुपयांपर्यंत आहे. घरच्या घरी देखील सोप्या पद्धतीने उटणे बनवता येते. बेसन, चंदन पावडर, गुलाबाच्या फुलांची पावडर, केशरच्या काड्या, हळद आणि तांदळाचे पीठ यांचा वापर करून तुम्ही सुगंधी उटणे बनवू शकता.
दीपोत्सवाच्या तयारीला वेग आला असून उटण्याचा सुगंध या सणाचा गोडवा अधिक वृद्धिंगत करणार आहे. यामुळे महिलावर्गातून दिवाळी व इतर खरेदीसोबत उटणे खरेदी केले जात आहे.
First Piper 